होली रंगहरूको पर्व हो, जसले हर्ष, उमंग र प्रेमको प्रतिकको रूपमा स्थान बनाएको छ। यो पर्व विशेष रूपमा हिन्दू समुदायले मनाउने भए पनि यसको रौनक सबै जात, धर्म र समुदायबीच फैलिएको छ। नेपालमा होली विशेष रूपमा हिमाली र पहाडी भूभागमा पूर्णिमाको दिन तथा तराई क्षेत्रमा अर्को दिन मनाइन्छ।
बाल्यकालका होलीहरू सम्झिँदा मन रोमाञ्चित हुन्छ। बिहानैदेखि साथीभाइ भेला भएर रंग, अबीर र पानी खेल्ने, विभिन्न मिठाइहरू खाँदै रमाइलो गर्ने सम्झना अविस्मरणीय छन्। घरका ठूला दाजु-भाइ, दिदी-बहिनीहरूले टोलटोलमा गएर होली मनाउँथे, गीत गाउँथे, नाचगान गर्थे। पुराना समयका होलीहरू साँच्चै आत्मीयता र सामूहिकता झल्काउने हुन्थे।
तर, आधुनिक समयमा होलीको स्वरूप केही परिवर्तन भएको छ। कतिपय स्थानमा होलीको नाममा जबरजस्ती र दुर्व्यवहार हुने प्रवृत्तिले यसको मौलिकता गुम्दै गएको अनुभूति गरिन्छ। त्यसैले, हामीले होलीलाई सौहार्दपूर्ण तरिकाले मनाउँदै यसको वास्तविक सौन्दर्य जोगाउनु जरुरी छ।
होली केवल रंगहरूको पर्व मात्र होइन, यो मनको मैलो मेट्ने, वैरभाव बिर्सने, प्रेम र सद्भाव फैलाउने पर्व पनि हो। आउनुहोस्, यस वर्षको होलीलाई थप सभ्य, सुरक्षित र यादगार बनाउँ
